Temporary access road sa nagubang dalan sa Paquibato gipanawagan

56
Davao City – Temporaryong sirado sa mga motorista ang karsada sa Barangay Fatima, Paquibato District, Davao City human kini nahugmak tungod sa kusog nga pag-ulan.

Sa interbyu sa DXDC RMN Davao kang Alfredo Baloran, hepe sa Davao City Disaster Risk Reduction and Management Office (CDRRMO), gisaysay niini nga agianan og tubig ang ilawom sa karsada ug tungod sa sagunson nga ulan, nihumok ang yuta rason nga kini ni-collapse.

Hinuon, walay gika-report nga naapektuhang balay o indibidwal tungod sa pagkahugmak sa karsada.

Na-report na usab sa Department of Public Works and Highways (DPWH) ang sitwasyon aron kini gilayong maaksyonan.

Samtang, nanawagan ang hepe sa CDRRMO nga butangan og temporaryong dalan nga pwede maagian aron dili hasol sa mga residente nga kinahanglan muagi sa lugar.

“Naghangyo ko nga through the City Engineer’s (Office) nga kung pwede magbutang una og temporary access road para naay maagian atong kaigsoonan kay luoy man pud kung muliko gyud. Layo kaayo ang agianan nila,” matud ni Baloran.



Sa pagkakaron, adunay nagabantay nga taga Barangay ug PNP personnel pagsigurong walay muagi sa area aron malikayan ang insidente.

RadyoMaN Kirby Manzon

Facebook Comments