Arestado ang isang 20-anyos na lalaki na kabilang sa Top 7 Regional Most Wanted Persons at Top 3 City Most Wanted Persons dahil sa mga kasong statutory rape at child abuse sa isinagawang operasyon ng Dagupan City Police Office noong gabi ng Oktubre 14, 2026.
Kinilala ang suspek bilang isang gumagawa ng kabinet at muwebles at residente ng Dagupan City. Naaresto siya ng pinagsanib na puwersa ng City Mobile Force Company, Police Station 2, at City Intelligence Unit.
Isinagawa ang pag-aresto sa bisa ng warrant of arrest na inilabas noong Oktubre 12, 2026 ng Regional Trial Court Branch 43 sa Dagupan City.
Walang inirekomendang piyansa para sa kasong statutory rape sa ilalim ng Article 266-A(1)(D) ng Revised Penal Code, na inamyendahan ng Republic Act 8353 at Republic Act 11648.
Samantala, itinakda naman sa ₱80,000 ang piyansa para sa kasong paglabag sa Section 10(a), Article VI ng Republic Act 7610 o Special Protection of Children Against Abuse, Exploitation and Discrimination Act.
Ayon kay DCPO City Director PCOL Arnold P. Solomon, patuloy ang kanilang operasyon laban sa mga wanted person bilang bahagi ng pagsisikap ng kapulisan na mapanatili ang kaligtasan ng publiko at maipatupad ang batas. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
