Kalibo, Aklan – Sambilog rong patay matapos nga mageontad rong aksidente kabii sa Jaime Cardinal L. Sin Avenue, Andagao, Kalibo, Aklan.
Rong biktima nakilaea kay Edmund Sapuiz Lachica, 26-anyos ag residente it Brgy. Tayhawan, Lezo.
Sa imbestigasyon it Kalibo PNP naga guwa nga kabii samtang si Jovel Timbas Goleña, 41-anyos ag residente it Brgy. Andagaw hay naga maneho it anang tricycle ag may pasahero nga sanday Liza Goleña, Jonel Goleña ag LJ Goleña halin sa Poblacion Kalibo ag maga liko pa waea sa Judge Martelino St., Andagaw pero pag abot sa kanto sanda ra hay hinapit man it sangka tricycle nga madasig rong padaeagan halin sa New Washington nga direksyon ag nagapaadto man sa Poblacion Kalibo nga gina maneho it biktima nga si Lachica ag may ana man nga pasehro nga nakilaea kay Elysito Emmanuel Clores it Libtong, Estancia, Kalibo.
Bangud sa madasig rong padaeagan ni Lachica ko anang tricycle hay bumalintong ag kumaya raya sa tunga it karsada matapos hapiton rong tricycle ni Goleña kung sa siin nakaangkon si Lachica it seryosong lastro sa eawas.
Insigida nga gin respondehan raya it MDRRMO Kalibo ang gindaea si Lahica sa hospital pero gindeklara raya nga dead on arrival it anang doctor samtang si Goleña ag ro anang mga pasahero hay gindeklara nga out-patient matapos mataw-an it nagakaigo nga pagbueong.
Si Lachica hay na-obserbahan nga una sa impluwensya it makahililong nga ilimnon tag matabo rong aksidente.
