Usa ka miyembro sa NPA, patay human ang engkwentro sa lungsod sa Impasug-ong

Padayon pang gina-ila sa mga kasundaluan ang patay’ng lawas sa usa ka rebeldeng New People’s Army (NPA) nga napatay atol sa engkwentro sa lungsod sa Impasug-ong, Bukidnon.

Gikatahong miyembro sa Regional Sentro De Gravidad (RSDG) Compaq sa North Central Mindanao Regional Committee (NCMRC) ang napatayng NPA human ang duha ka managlahing engkwentro partikular sa bukirong bahin sa Barangay Bontongon, Impasug-ong, Bukidnon adtong Biyernes.

Milungtad sa halos 30 minutos ang panagbinayloay og bala sa duha ka kampo kung asa napatay ang maong rebelde ug narekober ang usa ka M4A1 5.56mm carbine rifle, usa ka M14 7.62 mm rifle, lakip na usab ang mga gamit panggubat ug mga personal nga kagamitan sa rebeldeng NPA.

Padayon ang ginahimo nga operasyon karon sa tropa sa 43rd Division Reconnaisance Company (DRC) ilawom sa operational control sa 403rd Infantry Brigade sa Philippine Army paglakag sa mga nahibiling miyembro sa maong hugpo ilabi na diri sa probinsya sa Bukidnon nga padayong nag-operar sa kalasangan.