Naglabas ng pahayag ang Police Regional Office 1 kaugnay ng viral na video sa social media na nagpapakita ng mga turistang sumasayaw sa kahabaan ng national highway sa Brgy. Urbiztondo, bayan ng San Juan, La Union.
Ayon sa PRO 1, naganap ang insidente bandang ala-1:00 hanggang ala-2:00 ng madaling araw noong May 10, 2026, sa labas ng isang convenience store sa nasabing lugar.
Agad namang umaksyon ang mga nakatalagang pulis sa lugar upang patigilin ang aktibidad at maiwasan ang posibleng aksidente, matinding trapiko, at panganib sa kaligtasan ng publiko.
Sa kabila ng insidente, sinabi ng PRO 1 na walang naiulat na nasugatan o napinsalang ari-arian matapos ang mabilis na pagresponde ng mga awtoridad.
Bagama’t suportado umano ng PRO 1 ang masiglang turismo sa La Union, iginiit ng ahensya na hindi maaaring isantabi ang kaayusan at kaligtasan sa mga lansangan.
Paalala rin nila na ang mga hindi awtorisado at mapanganib na aktibidad sa national roads ay maaaring magdulot ng panganib sa buhay at paglabag sa batas-trapiko. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
