Davao de Oro – Sikop ang tulo ka mga lalaki atol sa hiniusang operasyon sa kapulisan ug ubang ahensya sa gobyerno sa Brgy. Cadunan, Mabini, Davao de Oro, human sila masakpan sa akto nga nagdiskarga og mga sigarilyong gituohang kontrabando.
Dali nga miresponde ang mga operatiba gikan sa Mabini Municipal Police Station uban sa laing mga law enforcement unit. Sa ilang pagsuta, nasayran nga ang mga sigarilyo gituohang walay legal nga dokumento ug kulang sa gikinahanglang Graphic Health Warnings.
Nakumpiska sa operasyon ang usa ka sakyanan, 36 ka sako, ug 10 ka master cases sa sigarilyo nga adunay kinatibuk-ang kantidad nga mokabat sa ₱705,000.
Sa pagkakaron, anaa na sa kustodiya sa Mabini MPS ang mga nadakpan ug ang mga nakumpiskang ebidensya alang sa hustong dokumentasyon ug pagsang-at sa mga kaso. Gisiguro usab sa kapulisan ang pagpadayon sa ilang kampanya batok sa smuggling aron mapanalipdan ang kaayohan sa publiko.
RadyoMaN Kareen Beltran
Facebook Comments
