Cauayan City – Nakahanap na ng teknolohiyang makatutulong laban sa pagkalusaw ng luya ang Department of Agriculture (DA) Field Office 2 sa pamamagitan ng Regional Crop Protection Center.
Ayon sa DA Nueva Vizcaya Experimental Station (NVES), layunin nitong mabawasan ang pinsalang dulot ng fungus at bacteria na matagal nang suliranin ng mga nagtatanim ng luya.
Tinatawag na bio-control agent ang natuklasang teknolohiya na napatunayang epektibo sa isinagawang pagsubok sa Ambaguio.
Sa halip na tuluyang mabulok, nagkaroon lamang ng bahagyang peklat ang mga luya at nanatiling maaari itong anihin at maibenta.
Hinikayat ng DA ang mga magsasaka na makipag-ugnayan sa kanilang tanggapan sa Villaros, Bagabag o sa Municipal Agriculture Office upang makahingi ng bio-control agent.
Inaasahan din nitong mapanatili ang mataas na produksyon ng luya sa Nueva Vizcaya na kinikilalang “ginger capital” ng bansa.
Bilang dagdag na suporta, naglaan ang DA ng P4 milyon para sa pagtatayo ng nursery sa Santa Fe at P2.6 milyon para sa pagpaparami ng disease-free ginger seedlings.
