Sa pagdiriwang ng Women’s month celebration, pinamunuan ng Land Transportation Office ang pagbibigay ng libreng theoretical driving course para sa female drivers sa Pangasinan.
Dinaluhan ng 87 female drivers, edad 16 hanggang 54, ang naturang training.
Sa pahayag ni Aileen Peteros, ang District Head ng LTO San Carlos City, ipinaliwanag niya na target ang kababaihan upang mabura ang gender bias sa pagmamaneho. Nais pa umano ng opisina nila na makapag-isyu pa ng mas maraming lisensya sa kababaihan partikular sa mga indigents dahil hindi lamang para sa lalaki ang pagmamaneho.
Layunin ng naturang driving course na makapagbigay ng tamang edukasyon sa traffic rules at training sa kababaihan lalo sa mga limitado ang kakayahan na makapag-enroll upang maging competent drivers.
Tinalakay sa driving course ang road and traffic rules; pre-driving orientation on motorcycles and tricycles; pre-driving orientation on motor vehicle basic parts, functions, and operations; defensive driving and MV maintenance; handling emergencies and breakdowns; at land transportation and related special laws.
Ang theoretical driving course ay kinakailangan bago makakuha ng student permit na siyang proseso para tuluyang makakuha ng driver’s license. |𝙞𝙛𝙢𝙣𝙚𝙬𝙨