Tiniyak ng Mababang Kapulungan ng Kongreso na ginagawa nila ang lahat ng pamamaraan upang maibsan ang epekto sa mga Pilipino ng pagtaas ng presyo ng langis.
Kabilang sa mga tinitingnan na solusyon dito ay ang pagsususpindi o pagbabawas sa excise tax sa langis.
Iginiit ng Kamara na hindi sila dapat magtamad-tamaran sa ganitong sitwasyon habang ang mga kababayan ay naghihirap sa mabigat na impact o epekto ng walang tigil na pagtaas sa presyo ng mga produktong petrolyo.
Nakasisiguro ring gagawa ng paraan ang house leadership at hahanap ng solusyon sa nasabing krisis matapos na magsagawa ang Ad Hoc Committee sa Kamara ng pagdinig kaugnay sa oil price hike sa gitna ng Russia-Ukraine conflict.
Nakahanda na rin ang Kamara anumang oras sakaling magpatawag nang “special session” si Pangulong Rodrigo Duterte para tuluyang pagtibayin ang panukala para sa suspensyon o pagbabawas sa fuel excise tax.
