Isinagawa ang oath-taking ceremony para sa A.B.K.D. Nakakabasa Program, o Ang Bawat Kabataang Dagupeño Nakakabasa Program, noong Setyembre 14 sa CSI City Mall sa Dagupan City, sa pangunguna ni Mayor Belen T. Fernandez.
Layunin ng programa na mabigyan ng karagdagang gabay ang mga batang nangangailangan ng suporta sa pagbabasa. Sa pamamagitan ng mga volunteer tutor, inaasahang matutulungan ang mga mag-aaral na mapaunlad ang kanilang reading skills at comprehension.
Kasabay ng panunumpa ng mga volunteer tutor, pormal ding tinanggap ng Dagupan City ang “Bayang Bumabasa: Mayors for Literacy” challenge na inilunsad ng Second Congressional Commission on Education o EDCOM 2.
Sa ilalim ng hamon, hinihikayat ang mga lokal na pamahalaan na bumuo at magpatupad ng mga hakbang upang matugunan ang learning gaps ng mga mag-aaral, partikular sa pagbasa na nagsisilbing mahalagang pundasyon sa iba pang larangan ng pag-aaral.
Nagbigay rin ng mensahe sa mga volunteer si Department of Agrarian Reform Secretary Conrado Estrella III bilang bahagi ng aktibidad. Dumalo rin sa programa ang mga kinatawan ng DAR at mga opisyal ng Pamahalaang Lungsod ng Dagupan.
Sa pagtanggap ng Dagupan City sa Bayang Bumabasa challenge, ipinakita ng lokal na pamahalaan ang suporta nito sa pambansang layunin na palakasin ang foundational literacy at palawakin ang access ng mga kabataan sa mga programang makatutulong sa kanilang pagkatuto.
Sa pamamagitan ng A.B.K.D. Nakakabasa Program, inaasahang mas mapapalawak ang pagtutulungan ng pamahalaang lungsod, mga volunteer, paaralan at iba pang sektor upang matugunan ang mga hamon sa literacy.
Sa pangunguna ng humigit-kumulang 500 volunteer tutors at sa patuloy na pakikipagtulungan ng iba’t ibang sektor, layunin ng programa na mas maraming kabataang Dagupeño ang matutong bumasa, makaunawa at magkaroon ng mas matibay na pundasyon para sa kanilang pag-aaral.
Sa huli, ang pagsusulong ng literacy ay hindi lamang responsibilidad ng mga paaralan o ng isang programa. Ito ay isang sama-samang pagkilos upang matiyak na bawat kabataang Dagupeño ay may kakayahang bumasa, umunawa at matuto. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
