Muling pinaalalahanan ang publiko hinggil sa modus operandi ng tinaguriang “Laslas Bag Gang” na karaniwang nambibiktima sa mga matataong lugar tulad ng mga jeep, bus, palengke, at terminal.
Batay sa impormasyon, gumagamit ang grupo ng iba’t ibang paraan ng “distraction” gaya ng sinadyang paghulog ng barya, panunulak, o paggitgit upang mailihis ang atensyon ng biktima. Habang abala ang target, palihim namang nilalaslas ng kasabwat ang bag o bulsa upang makuha ang mahahalagang gamit tulad ng cellphone at pera.
Dahil dito, pinapayuhan ang publiko na maging mas mapagmatyag at sundin ang ilang paalala upang makaiwas sa ganitong uri ng krimen.
Ilan sa mga inirerekomendang hakbang ay ang pag-iwas sa paggamit ng cellphone o earphones habang nasa siksikang lugar, paglalagay ng bag sa harap ng katawan at mahigpit na paghawak dito, at paggamit ng harapang bulsa para sa wallet at cellphone.
Pinapayuhan din ang mga biyahero na umiwas sa matataong bahagi kung may mas maluwag na alternatibo, maging maingat sa pakikisalamuha sa mga estranghero, at agad suriin ang kanilang mga gamit kapag nakaranas ng tulakan o kaguluhan.
Dagdag pa rito, inirerekomenda na ihanda na ang pamasahe bago sumakay upang maiwasan ang paglalabas at pagbibilang ng pera sa pampublikong lugar.
Patuloy namang hinihikayat ng mga awtoridad ang publiko na maging alerto at agad ireport ang anumang kahina-hinalang aktibidad upang mapigilan ang operasyon ng mga kriminal at mapanatili ang kaligtasan sa komunidad. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
