Ipinakita sa impeachment trial ang disbursement ng confidential funds ng Department of Education (DepEd) na may iisang petsa pero inisyu sa magkakaibang lugar.
Isinapubliko ni Atty. Lorna Kapunan ng prosecution team ang acknowledgment receipts (AR) na may petsang February 21, 2023 na inisyu sa Danao, Malolos, Davao City, Negros Occidental, Agusan del Sur, Makati at Negros Oriental.
Mayroon ding acknowledgement receipts na may petsang February 25, 2023 na inisyu sa Masbate, Laoag, Davao City, Agusan del Norte, Olongapo, Samar, Loboc, Pangasinan at Compostella Valley.
Dagdag pa rito ang AR na may petsang March 15, 2023 na inisyu sa Davao City, Tandag, Mindoro, Laguna, Agusan del Norte, Olongapo, Zamboanga City, Butuan City, Nabunturan, Laguna, Cavite, Surigao del Norte, Quezon City, Iligan City, Tarlac City, Pasay City, Samar, Compostella Valley, San Juan at Ifugao.
Sinabi ni Commission on Audit-Intelligence and Confidential Funds Audit Office (COA-ICFAO) state auditor Xylene del Campo na ang mga lugar ay tumutukoy kung saan ginawa ang bayaran o paglalabas ng confidential funds.
Taliwas sa naunang certification ng OVP, ang certification naman ng DepEd mula sa Armed Forces of the Philippines (AFP) ay sumusuporta sa payment of rewards ng confidential activities, ibig sabihin nakasunod ito sa hinihinging requirements ng joint circular sa dapat na paggamitan ng confidential funds.
