Kalibo, Aklan – Arestado it mga kapulisan rong live-in partner it High Value Target 2 matapos nga ipaidaeom sa buy-bust operation kabii sa Sitio Baybay, Brgy. New Buswang, Kalibo, Aklan.
Ro suspek nakilaea kay Maribel Manos, 29-anyos ag residente it Punta Taboc, Roxas City.
Si Manos hay live-in partner ni Ryan Aninacion nga HVT 2 drug personality sa Roxas City nga nauna eong nadakpan sa ginpatigayaon man nga buy-bust operation sa Brgy. Bulwang, Numancia ko nagtaliwan nga adlaw it Dominggo.
Gin aresto si Manos matapos nga mabakean imaw ko poseur buyer it sangka sachet it suspected shabu kabaylo it P 1,000.00 nga marked money.
Samtang sa ginpatigayon man nga body search sa suspek may nabuoe kana nga sangka pouch ag na recover pa gid ro daywa ka mga sachet it suspected shabu, drug paraphernalia, kwarta sa sari-sari nga denominasyon ag cellphone nga may drug transactions.
Si Manos ay detained sa lock up cell it Kalibo PNP ag posible magapangatubang it kasong pagbayolar sa Sec. 5, Sec. 11 ag Sec. 12 kung R.A. 9165 ukon Comprehensive Dangerous Drug Act of 2002.
