Davao City – Nagpatabang sa kapulisan ang usa ka 51-anyos nga amahan nga giilang si Alyas “Jose” human nasamdan ang iyang 15-anyos nga anak nga giilang si Alyas “Jomar” (mga bansagon gitago tungod sa seguridad), may kalambigitan sa nahitabo nga komosyon tali sa laing usa ka menor de edad sa Smile Tinikling Street, Lanzona Subdivision, Brgy. Matina Aplaya, Davao City, alas-4 sa hapon, Hulyo 16, 2026.
Matud sa inisyal nga imbestigasyon sa Davao City Police Office (DCPO), ang biktima nakasaksi sa pag-bully sa usa ka menor de edad ngadto sa laing usa ka menor de edad sa maong lugar; nagpatunga ang biktima apan nahitabo hinoon ang pisikal nga kagubot.
Nasayran nga ang menor de edad nga offender nilakaw ug nagkuha og pitsikorno, nga miresulta sa ikaduhang pisikal nga komprontasyon ug pagkasamdan sa biktima sa tuo nga abaga.
Daling nakasibat ang menor de edad nga offender samtang gidala na sa iyang amahan ang biktima sa balay-tambalanan alang sa medikal nga konsultasyon. | via RadyoMaN bien Abanos
RadyoMaN Bien Abanos
Facebook Comments
