Pinalawak ni Pangulong Ferdinand Marcos Jr. ang access sa social protection programs ng mga Contract of Service (COS) at Job Order (JO) workers sa pamahalaan.
Sa ilalim ng Administrative Order No. 43 na inilabas noong June 3, maaaring kaltasin sa kanilang compensation ang kontribusyon sa Social Security System (SSS), PhilHealth at Pag-IBIG Fund, basta may pahintulot ng worker.
Sa ganitong sistema, maaaring direktang i-remit ng government agency ang hulog sa tatlong ahensya, kaya hindi na kailangang sila mismo ang mag-asikaso nito.
Sakop ng kautusan ang COS at JO workers sa national government agencies, kabilang ang mga department, bureau, office, Government-Owned or -Controlled Corporations (GOCCs), at State Universities and Colleges (SUCs).
Hinihikayat din ang mga local government unit (LGU) na ipatupad ang parehong sistema.
Mananatiling boluntaryo ang arrangement at kailangan ang malinaw na consent ng worker bago magkaroon ng deduction sa compensation. Hindi rin nito binabago ang umiiral na contractual relationship ng COS at JO workers sa gobyerno.
Inatasan ang Department of Budget and Management (DBM), Civil Service Commission (CSC), Commission on Audit (COA), SSS, PhilHealth at Pag-IBIG Fund na maglabas ng guidelines at accounting procedures para sa pagpapatupad ng kautusan.
