Kasado na sa Lunes, September 14, at target tapusin sa ikalawang linggo ng Oktubre ang pagpi-presenta ng prosekusyon ng mga testigo at ebidensiya para sa ikalawang article of impeachment na kinapapalooban ng alegasyong may hindi maipaliwanag na yaman si Vice President Sara Duterte na hindi nito idineklara sa kanyang Statement of Assets, Liabilities and Net Worth o SALN.
Sina House Prosecutors Representatives Terry Ridon at Chel Diokno ang mangunguna sa pagtalakay ng Article 2.
Unang sasalang bilang mga testigo sina retired Sandiganbayan Presiding Justice Amparo Cabotaje-Tang; Records Division of the Office of the Ombudsman Officer-in-Charge Atty. Karen Batu; at Atty. Gerardo Del Rosario, na siyang director ng Company Registration and Monitoring Department ng Securities and Exchange Commission (SEC).
Ayon kay Ridon, iikot ang testimonya ni Justice Cabotaje-Tang sa prinsipyong sumasakop sa public accountability, integridad ng public office, at mekanismo kaugnay sa undisclosed at unexplained wealth at pinagbabawal na business interests.
Tatalakayin naman ni Batu ang SALN records ni VP Sara, habang tututukan naman sa testimonya ni Del Rosario ang authentication at identification ng mga corporate records na konektado kay Duterte.
