Hiniling ng House prosecution panel sa Senate Impeachment Court na ipa-subpoena ang chief-of-staff ni Vice President Sara Duterte na si Atty. Zuleika Lopez gayundin si National Bureau of Investigation (NBI) Director Melvin Matibag.
Nais ng prosekusyon na humarap sila bilang mga testigo sa impeachment trial sa July 13, 14 at 15.
Ayon sa prosekusyon, ang testimonya ni Lopez at Matibag ay material, relevant at necessary para patunayan ang alegasyong nakapaloob sa Article IV ng Articles of Impeachment.
Patungkol ito sa alegasyong may kinontrata si VP Sara para patayin sina Pangulong Ferdinand Bongbong Marcos Jr., First Lady Lisa Araneta Marcos at dating House Speaker Ferdinand Martin Romualdez.
Magugunitang binitiwan ni VP Duterte ang nabanggit na pagbabanta sa isang online press conference noong November 23, 2024 sa House of Representatives kung saan si Lopez ay nakaditine noon matapos ma-contempt sa pagdinig ukol sa maling paggamit ng confidential funds.
