Nanindigan ang House Prosecution Panel na marapat lamang na kasamang busisiin sa impeachment trial ang kabuuang yaman ng mister ni Vice President Sara Duterte na si Atty. Manases Carpio kahit na siya ay isang pribadong indibidwal.
Binigyang-diin ito ni House Prosecution Legal Spokesperson Atty. Benjamin Tolosa Jr. sa harap ng kanilang hiling sa impeachment court na ipa-subpoena ang bank at tax records ni Vice President Duterte at kanyang asawa.
Paliwanag ni Tolosa, kasama sa mahigit ₱80 milyon na net worth ni Vice President Sara ang conjugal properties nilang mag-asawa.
Ang mga dokumentong ipinapa-subpoena ng prosekusyon ay para sa Article II ng Articles of Impeachment kaugnay ng umano’y hindi maipaliwanag na yaman ni Vice President Sara na hindi niya idineklara sa kanyang Statement of Assets, Liabilities and Net Worth (SALN).
Punto naman ni House Trial Spokesperson Zia Alonto Adiong, “by virtue of marriage” ay nagiging iisang tao na sina Duterte at Carpio.
