Parusa sa mga magulang na pabaya at hindi magsusustento sa anak, isinulong sa Kamara

Isinulong ng ilang mambabatas na makulong at pagmultahin ang mga magulang na “pabaya” at hindi magbibigay ng sustento sa kanilang mga anak.

Nakapaloob ito sa House Bill 4807 o Child Support Responsibility Bill na inihain nina Davao City Rep. Paolo Duterte, Benguet Rep. Eric Yap at ACT-CIS Party-list Reps. Edvic Yap at Jeffrey Soriano.

Itinatakda ng panukala na ang sustento sa anak ay hindi maaaring bumaba sa P6,000 kada buwan o P200 kada araw batay sa pinagsamang kita ng mag-asawa.


Sa ilalim ng panukala, ang mga magulang na paulit-ulit na hindi magbibigay ng sustento ay makukulong ng dalawa hanggang apat na taon at pagmumultahin ng P100,000 hanggang P300,000.

Hindi rin sila bibigyan ng pasaporte at kakanselahin o susupindihin ang drivers’ license, professional at occupational license, recreational o sporting license.

Para mapwersa ang mga magulang na magbigay ng child support ay maaaring hawakan ng pamahalaan ang ari-arian, tax refund, i-report sa consumer credit bureau, kaltasan ang kanilang sweldo o retirement benefits at iba pa.



Ipapasok naman sa mga programa ng gobyerno para magkaroon ng kita ang mga magulang na walang trabaho.

Facebook Comments