Nagpahayag si Pangulong Ferdinand Marcos Jr., ng kahandaang makipagtulungan sa Senado upang maisulong ang mga prayoridad na panukalang batas ng pamahalaan.
Sinabi rin ng pangulo na susuportahan niya ang sinumang opisyal na piliin ng Senado bilang presiding officer sa impeachment trial ni Vice President Sara Duterte.
Ayon kay Pangulong Marcos, iginagalang niya ang kapangyarihan ng Senado sa pagpili ng mamumuno sa impeachment proceedings at wala siyang pagtutol sa magiging desisyon ng mga senador basta’t naaayon ito sa Konstitusyon at umiiral na proseso.
Binigyang-diin din niya ang kahalagahan ng isang patas at kapani-paniwalang impeachment trial upang mapanatili ang tiwala ng publiko sa mga institusyon ng pamahalaan.
Umaasa rin ang pangulo na ang bagong liderato ng Senado ay makatutulong upang mapabilis ang pagtalakay sa mahahalagang panukalang batas na pakikinabangan ng mamamayan.
