Inanunsiyo ng Korte Suprema ang karagdagang detalye na kaugnay sa nalalapit na 2025 Shari’ah Bar Exams.
Ayon sa SC, ilalabas ng alas-sais ng gabi ng May 25 ang exam files para sa unang araw ng pagsusulit.
Alas-sais ng gabi ng May 27 naman ilalabas ang Day Two Exam Files.
Maaaring idownload sa mga petsang ito ang examination files para sa Shari’ah Special Bar Examinations sa pamamagitan ng Examplify.
Pinayuhan naman ang mga examinee na agad i-download ang exam files sakaling lumabas na upang maiwasan ang delay o last-minute technical issues.
Kinakailangan din na nadownload na ang mga ito bago pumasok sa Local Testing Center at walang ibibigay na palugit sakaling mabigo sa paghahanda ang magsusulit.
Nauna nang sinabi ni Associate Justice Antonio T. Kho, Jr., na gagawing digital ang Shari’ah Bar Exams sa mga designated local testing center sa bansa alinsunod sa Strategic Plan for Judicial Innovations 2022-2027 na mag-adapt sa teknolohiya.
