Mariing itinanggi ni House Prosecutor at Bicol Saro Party-list Representative Terry Ridon ang paratang ni Vice President Sara Duterte na may conflict of intrest sa impeachment trial ang pagiging consultant niya noon sa Davao City government.
Diin ni Ridon, ang kaniyang consultancy services noon sa City Government ng Davao ay limitado lamang sa poverty alleviation at wala itong kaugnayan sa impeachment case ni VP Sara na nililitis sa impeachment court.
Dagdag pa ni Ridon, nagampanan niya nang mabuti ang trabaho nya at nakapagsumite ng kailangang reports sa Davao local government unit at wala itong koneksyon sa tungkulin niya ngayon sa proseso ng impeachment.
Paliwanag ni Ridon, magkaiba ang responsabilidad niya noon sa Davao LGU sa responsibilidad niya ngayon bilang prosecutor at syang namumuno sa presentation sa impeachment trial ng ikalawang Article of Impeachment patungkol sa hindi maipaliwanag na yaman ni VP Sara.
