Iginiit ng House Prosecution Panel na hindi maaaring gamitin ni Vice President Sara Duterte ang kanyang constitutional right against self-incrimination upang iwasan ang pagharap sa impeachment trial.
Paliwanag ni House Prosecution Spokesperson at Counsel Benjamin “Jay” Tolosa Jr., ang karapatan laban sa self-incrimination o pagtestigo laban sa sarili ay maaaring gamitin sa bawat tanong na maaaring magdiin sa kaukulang indibidwal sa kasong kriminal.
Diin pa ni Tolosa, magkaiba ang impeachment sa isang karaniwang kasong kriminal.
Sa kabila nito, sinabi naman ni Tolosa na ipinauubaya nila sa Senate Impeachment Court ang pagpapasya sa hiling ng prosecution na i-subpoena si VP Sara upang humarap sa kanyang impeachment trial sa oras na matapos ang presentasyon ng apat na Articles of Impeachment.
