Iginiit ni Vice President Sara Duterte na walang bago sa mga alegasyon ni dating Senador Antonio Trillanes IV hinggil sa aniya’y bilyong pisong bank accounts niya.
Ayon kay VP Sara, ang nagbago lamang kay Trillanes ay ang nasa likod ng kanyang makinarya.
Partikular ang aniya’y pangulo na tumatangging magpa-drug test at ang mga mambabatas na “law bender” na tumatanggap ng maleta.
Inupakan din ni VP Sara ang mga tauhan ng Commission on Audit (COA) at ng Anti-Money Laundering Council (AMLC) na aniya’y nagpapagamit sa pulitika.
Iginiit din ni VP Sara na lahat ng kanyang ari-arian at pera ay nakadeklara sa kanyang SALN.
Nagbabala rin sa mga Pilipino si VP Sara hinggil sa lalong lumalalim na paggamit at pang-aabuso ng administrasyon sa mga institusyon para sa pulitika.
Inupakan din niya ang katahimikan at takot na managot sa bilyon-bilyong pisong ninakaw, ang mga salaping inilagay sa maleta, at inilabas sa bansa.
