Ayon sa pulisya, seryosong usapin ang pagpapakalat ng mga online threat dahil maaari itong magdulot ng takot, pagkaantala sa operasyon ng mga paaralan, at panganib sa publiko.
Binigyang-diin din ng mga awtoridad na may kaakibat na pananagutang kriminal ang sinumang mapatutunayang nasa likod ng paggawa at pagpapalaganap ng mga ganitong uri ng maling impormasyon.
Kasunod ng pagkalat ng naturang post, pansamantalang sinuspinde ang klase sa Manaoag National High School bilang pag-iingat.
Agad ding nagsagawa ng security assessment ang pulisya at nagtalaga ng karagdagang mga pulis sa loob at paligid ng paaralan.
Nakiisa rin ang Municipal Disaster Risk Reduction and Management Office sa pagpapatupad ng mga hakbang upang matiyak ang kaligtasan ng mga mag-aaral, guro at kawani.
Ayon naman sa pamunuan ng paaralan sa pangunguna ni Dr. Daisy S. Mayola, mabilis silang nakipag-ugnayan sa mga kinauukulang ahensya sa sandaling lumabas ang social media post.
Sa isinagawang pagberipika ng awtoridad ay wala namang naitalang insidente o nasaktan. Wala ring mapanganib na armas sa loob ng paaralan.
Sa kabila nito, nananatiling nakaalerto ang mga awtoridad habang nagpapatuloy ang imbestigasyon. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
