ALAMINOS CITY, PANGASINAN — Inaasahang mas mapapadali ang pagbiyahe ng mga residente at turista sa Alaminos City sa pamamagitan ng bagong kalsadang nag-uugnay sa Lucap Baywalk at Mangrove Eco Park.
Bahagi ang proyekto ng mga inisyatibo sa pagpapaunlad ng imprastraktura at turismo sa Western Pangasinan, sa pangunguna ni First District Congressman Arthur Celeste, katuwang ang mga lokal na opisyal, kabilang ang pamahalaang lungsod ng Alaminos.
Layunin nitong mapabuti ang akses sa mga pangunahing destinasyong panturismo, partikular sa mga lugar na malapit sa Hundred Islands National Park.
Bukod sa mga turista, inaasahang makikinabang din sa mas maayos na transportasyon ang mga lokal na negosyante, mangingisda, tour guides, tricycle drivers at iba pang residenteng umaasa sa turismo bilang kabuhayan.
Nauna nang binigyang-diin ni Congressman Celeste ang kahalagahan ng mga proyektong pang-imprastraktura sa pagpapalakas ng lokal na ekonomiya at paglikha ng karagdagang oportunidad sa trabaho.
Gayunman, mahalaga ring matiyak ang regular na maintenance ng kalsada, kaligtasan ng mga motorista at pangangalaga sa mga bakawan at coastal ecosystem na malapit sa proyekto.
Samantala, inaasahang magiging bahagi ang bagong daan ng mas malawak na pagpapaunlad sa sektor ng turismo sa Unang Distrito ng Pangasinan. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
