Apektado ang bentahan ng ilang manlalako sa pampublikong pamilihan ng Calasiao dahil sa malakas at tuloy-tuloy na pag-ulan.
Ayon kay Lourdes Soriano, isa sa mga manlalako, nababaha ang harapang bahagi ng kanilang puwesto tuwing lumalakas ang ulan.
Bukod dito, naaapektuhan din umano ang kanilang kita dahil kumokonti ang mga mamimiling nagtutungo sa pamilihan kapag masama ang panahon.
Kadalasang humuhupa naman ang problema sa mga naiipong tubig kapag tumitigil ang ulan.
Ang ilan sa mga manlalako ay naglagay na ng mga pansamantalang panakip sa mga bahagi ng bubong na pinapasukan o tinutuluan ng tubig upang hindi ito dumeretso sa kanilang mga puwesto.
Ang iba naman ay nagsusuot na lamang ng bota bilang pansamantalang proteksiyon sa kanilang mga paa upang maipagpatuloy ang pagtitinda kahit may naiipong tubig sa palengke.
Sa kabila nito, patuloy pa ring umaasa ang mga manlalako na maging maayos ang panahon upang makabalik sa normal ang pagdagsa ng mga mamimili at ang kanilang bentahan. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
