Nagsasagawa na ang Department of Energy (DOE) ng assessment sa critical infrastructure kasunod ng malakas na lindol sa Sarangani Province at mga karatig na lugar.
Ayon sa DOE, nakikipag-ugnayan na ang Task Force on Energy Resiliency sa electric cooperatives, distribution utilities, at oil industry stakeholders para ma-assess ang impact ng 7.8 magnitude na lindol sa energy facilities doon.
Kinokolekta na rin ng DOE ang mga ulat hinggil sa kundisyon ng power lines, substations, distribution facilities, fuel depots, retail stations, at iba pang energy infrastructure upang matukoy ang epekto sa mga pasilidad.
Tiniyak din ng Energy Department ang patuloy na monitoring upang matiyak ang tuloy-tuloy na supply ng kuryente at petroleum products sa mga apektadong komunidad.
