Arestado ang dalawang magkapatid sa isang matagumpay na buy-bust operation laban sa ilegal na droga na isinagawa ng mga tauhan ng Sual Municipal Police Station (MPS), katuwang ang Philippine Drug Enforcement Agency Regional Office 1 (PDEA RO1), noong August 17, 2026 sa Sual, Pangasinan.
Nasakote sa operasyon ang isang 37 anyos na lalaki at ang kanyang 26 anyos na nakababatang kapatid. Pareho silang residente ng San Carlos City, Pangasinan at parehong construction worker.
Nakumpiska mula sa mga suspek ang dalawang heat-sealed transparent plastic sachet na naglalaman ng puting mala-kristal na substansiya na hinihinalang shabu. Tinatayang nasa 11.5 gramo ang kabuuang timbang nito at may Standard Drug Price na P78,200.
Narekober din sa operasyon ang iba pang ebidensya at isang itim na motorsiklo na umano’y ginagamit ng mga suspek sa kanilang ilegal na aktibidad. Nasa kustodiya na ng Sual MPS ang mga naarestong magkapatid at ang mga nakumpiskang ebidensya para sa kaukulang dokumentasyon at disposisyon.
Inihahanda na ang reklamo laban sa mga suspek dahil sa paglabag sa Republic Act No. 9165 o Comprehensive Dangerous Drugs Act of 2002. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
Facebook Comments
