Kinumpirma ni House Prosecutor at Manila Representative Joel Chua na si Mary Grace Piattos ay kasama sa listahan ng mga testigo sa impeachment trial ni Vice President Sara Duterte, ngunit hindi pa nila ito nakakausap.
Diin ni Chua, mahalagang testigo si Mary Grace Piattos sa kaso kaugnay ng alegasyon ng maling paggamit ng confidential funds.
Ang pangalang Mary Grace Piattos ay nakasaad sa acknowledgment receipt na isinumite ng kampo ni Duterte sa Commission on Audit (COA) hinggil sa paggamit ng confidential funds.
Ayon kay Chua, titingnan nila kung may magpapakilalang Mary Grace Piattos upang maisailalim ito sa cross-examination. Aniya, kung walang lilitaw na ganoong tao, maaaring lumabas na bogus o hindi totoong tao ang naturang pagkakakilanlan.
Ipinunto rin ni Chua na kung codename lamang ang “Mary Grace Piattos,” dapat ilahad ng defense team ni Vice President Sara Duterte kung sino talaga ang taong tinutukoy nito.
