Nananatiling bukas ang administrasyon ni Pangulong Ferdinand Marcos Jr. sa mga panawagan na suspendihin din ang excise tax sa diesel at gasolina.
Ito ang sinabi ni Finance Undersecretary Karlo Fermin Adriano sa pagdinig ngayon ng Legislative Energy Action and Development (LEAD) committee.
Sabi ni Adriano, nagsasagawa ng regular na assessment sa sitwasyon ang Development Budget Coordination Committee (DBCC) gayundin ang Unified Package for Livelihoods, Industry, Food, and Transport (UPLIFT) Committee.
Paliwanag ni Adriano, anumang hakbang kaugnay sa hirit na suspension ng excise tax sa diesel at gasolina ay ibabatay sa evaluation ng DBCC at UPLIFT Committee.
Sa ngayon ay ang excise tax pa lang sa liquified petroleum gas at kerosene ang sinususpinde ni Pangulong Marcos.
